Liebs Bookingteam, warum Hyperculte?
Mit däre Bänd pflägemer euis frankophoni Liebi.
Das isch eini, wo ihre Bass i ihres Drummset iigschpannt häd und perkussionistisch mit däm schpillt – aso mit de Sticks – und eine wo Kontrabass mit mehrere Schichte Klangeffekt übertönt.
Sphärisch.
Ätherisch, wie de Leo Niessner wür säge.
Die händ im Royal gschpillt, quasi abgrisse.
Sind megalässig xii.
Psychedelisch, träumerisch, aber gliichziitig au triibend und vom Gsang här parolehaft, aso nöd würkli gsunge, fascht gschnurred.
Ich finde, si passed u guet as Festival des Arcs, will si euses Publikum wahrschiinlich au rächt usefordered.
Si bezeichned ihri Schtilrichtig as minimalist transpop prekraut postdisco.
Passt.
