Liebs Bookingkollektiv, wiso spiled JMO am Festival?
De Jan Galega Brönnimann hämmir mal aagfragt für A.Spell.
Die händ dänn aber gfunde, für eusi Gage-Vorschtellige chämmed si niemals.
Aber de Jan häd dänn xeit, er chömi gärn mit Brinkmanship.
Säb isch dänn superlässig xii.
All völlig gflasht.
Miteme riise Inschtrument wo niemerd gwüsst häd, wies heisst.
E Kontrabassklarinette!
Er isch en würkli renommierte Musiker, häd tuusig Projekt, finded eifach au läss, was mir so mached und mälded sich au immer mal wieder miteme Vorschlag bi euis.
JMO sind ebe är mitem Sax, en Kora- und en Hangschpiller.
International uufgschtellt, us de Schwiiz, Senegal und Israel.
Träumerisch, underschiedlichi Schtilrichtige, Griot, Jazz, wunderschön.
En grandiose Iischtig in Samschtigaabig und en lässige Abschluss vom Namitag.
Ich freu mich extrem druff, am Hang z’hocke und mit ine de Sunneundergang zfiire.
